جود

يدك الصغيرة قلبي
قدماك الصغيرتين رئتاي
رائحة استفراغك تشعرني بالدفء
يدك التي تمسك بأصبعي هي محفظة لمشاعريجود
بنتي وحبيبتي وحياتي كلها
قطعة سكر بيتحوكش حوليها النمل
في بعيونك نجوم بتضوي بس تضحكي
رح جبلك حمالة مشان ضلني حاملتك ليل نهار
روح واجي فيكي واتمشى معك نشتغل شغل البيت سوا
نجلي سوا
نمسح سوا
نقطع سلطة سوا
وننضف ببروناتك سوا
حتى لو ضهري وجعني زيادة معليش بيكفيني انك حدي وقلبك حد قلبي.
أنتي الملقط يلي ماسك ضهري يلي صاير شقفتين.
أنتي جسر بيناتهن
أنتي لزقة الجروح ع هالقلب يلي شبع تدفيش.
أنتي وحدك يلي بتخليني اضحك من قلبي وبصوت عالي ع جنوناتك .
بسمتك بوشي وقت كون معصبة بتكسر كل شي جليد حواليه
بتذكرني بروحي انو لسى فيني روح.
بدي نرسم سوا بس تكبري ونطوي تيابك سوا ونحطهن بالخزانة
بدي جبلك زريعة نزرعها سوا وعلمك شلون تديري بالك عليها
جبلك اكلات طيبة من الماركت وفرحك فيهن لأنك بتحبي الاكل كتير.
بدي جبلك أرنب بعيون مكحلة متل عيونك
وبقلب عيونو نجمة بتضوي متل نجمات عيونك
بس نجمة وحدة بس لانو نجمات عيونك أكتر .
بحب الليل بس يجي لأني بحب نام حدك
حد عيونك المغمضين ونجومهن الغافيةبتفيقي الصبح بتدوري عليي حواليكي
بتصبح بوشك كل يوم الصبح وبضحكاتك يلي بيطلو بس تشوفيني
صحيح انا ما عم لاقي وقت لاشرب قهوة الصبح بس
بشرب قهوة من لون عيونك .
بفطر ع لحسة من ريقك النازل من تمك
وبدفى بس ضمك
رح خليكي حدي ع طول
عم جمعلك تذكارات صغيرة ورح حطلك ياهن بصندوق خشبي لونو ع لون عيونك
مشان بس تكبري اعطيكي ياه تشوفيه
فيه كل شي مني ألك
كراكيب ذكرياتي معك
لحظات من حياتي ألك
مخبيتلك كتير شغلات جوا هالقلب
مخبيه بوري بوظة ع ليمون
وشوية قرفة وجوز
مخبيتلك ريحة معسل عنب بس اوعك تأركلي ها

ذكرياتخليكي حدي
اوعك تتركيني
اوعديني اوعي عني تغيبي
مشان هالضهر يضلو واقف ع حيلو
وهالقلب ما يوقع من التدفيش
خليكي حدي اوعك تتركيني ..

 

كتبت في ١١ يونيو ٢٠١٧

 

 

حكــــــــي ختايريـــــــــــــــــــــــه

صفى بهالعمر يوميــــن

قلنا نحب ونعشق فيــــن

حبينا وعشقنا تنــــــيــن

صرنا نخربط بأساميــن!

*   *   *   *   *   *   *

سألنا الحبيب قديش الساعــــــــة

قلي بحبك قد الاشواق الملتاعـة

قلتلو يا زلمي كبرنا عالحـــــب!

ويا بعدي بس لو تحط هالسماعة!

15/12/2011

غيرك ما بدي

عم أحلم فيك بيوم بيجي
حط فيه راسي ع صدرك
متل مخدة
أغفى وأحلم
ومحدا قدي
عم أحلم بيوم شوفك
حط عيوني عليك
وحط قلبي حدي
أوعى ع صوتك كل ما طل الصبح
أوعى ع بوسة و الشوق اللي فيي ما يهدي
روح وأجي أتنفس ع دقات قلبك
أتنفس ورد خدك
أشرب كاسة وعيت ع شفافك
تَ يورد لون خدك ع خدي
أنا غيرك ما بدي

ع قد مافي بحور بغير عيونك ما غرقت
ع قد مافي سماوات وجسور
بغير كتافك ما وقعت
ع قد مافي مطر ودنيا تشتي
ع غير دفا جسمك ما لقيت طرقات تودي

عم أحلم بيوم يجي
صيف وسما زرقة
تنزل فيه من عيوني دمعة متل مطرة
شوفك فيه وقلبك ع قلبي يندي
قلك بحبك
ويحمرو الخدود
وقلك غيرك ما بدي ..

غادة رستم

صوتكَ

بحضن الليل انا غنيت
وسرقت من دنيا بخيلة
حبك سرقة ..
بلاك خدود هالروح كحيلة
وبعتم الليل شو بيبقى..
صوتك لما همسلي
غمرني
وحن قلبي للملقى..
ببعدك عني آخدني
مجنني
وقلبي بهجرك ما بيتحمل
وبيشقى..
مافي منك
بعشق وصوفك
كلك كامل الخلقة..
ولما بتبهدل فيي بتمون
قلبي معك شو بيحب العلقة..
صفى بهل الدنيا تلات نجوم
بعدهن العالم لو بيدَوّر
ما بيلقى..
عيونك ولونهن المجنون
وقلبك يلي بمنتهى الرقة

غادة رستم

وقت ما حبيتك

شو كان وما كان
بوقت ما كان في علبة كبريت
وعليها قطرات الندى تبيت

بوقت ما حبيتك انا
وقتا انا ع الدني وعيت

 

شو كان وما كان
وقت ما تشتي الدني
خبيت بعيوني انسان

 

بوقت ما حبيتك انا
وقتا انا حالي نسيت

 

وشو كان وما كان
وقت ما طارت علبة الكبريت
وغاب الندى والخيطان
وحدي انا ع الارض بقيت

 

بوقت ما نطرتك انا
..وقتا انا تحت التلج غفيت

 

عشر طعشر حاجز!

مشاهد من على الحواجز من رحلتي الى الشام الاسبوعية

( حاكم النزلة ع الشام صارت تاخد وقت متل السفرة ع شي بلد بعيد بطيارة
او ع شي محافظة بسيارة)
أضافة الى أنو بمرق ع عشر طعشر حاجز!

حاجز أوعك تتلبك!

– يا سيد فلان شو جايي تساوي هون؟
– انا رايح لعند أبن عمي
– ووين أبن عمك ؟
– ببلودان
– شو بيشتغل ؟
– ما بعرف!
– أي انزيل لكان

وراح الزلمة ونزل ومشينا بالسرفيس من دونو
طبعآ هو هربان من القصف ع منطقة آمنة وكذب انو عند أبن عمو قاعد!

حاجز عايش ع القلة

– فلان الفلاني شو جايي تساوي هون؟ ووين سند الاقامة؟
– أنا جايي زيارة لعند بيت عمتي
– بس يصير القصف ع منطقتكن بتشطرو تساوو زيارات لعند عمتكن!

حاجز لئيم

– أنا من السودان
– شو جايي تساوي هون؟
– ساكن من زمان هون
– من وين من السودان؟
– من الخرطوم
– خرطوم .. نبريش .. هع هع هع هع!!!! يلا امشو

بحب قول للمجند ( ضحكة عنزة ع باب المسلخ)

حاجز لئيم تاني

– شوفي بقلب هالكياس؟
– شو بدو يكون في يعني؟ تياب..
– وليش عم تصرخي؟
يلي حدها بتقول: – ما عم تصرخ
– يعني شو بدو يكون جهاز عرايس .. شو رايك تفتشهن يعني؟!
– …………….
صوت تسكير لباب السرفيس ..
– يلا امشو

حاجز ع اساس ظريف

 

– النسوان .. فتحو جزادينكن مشان نفتش
– ……….بيفتش المجند بالشناتي وبيسأل كمان عن يلي بقلبهن !

 

– يا لطيف شو بتحطو مكياج ع وجوهكن!
– ……….

حاجز مالو طعمة

– انتي..! عطينا هويتك!

عم يقولها طبعآ بكل جاهزية واستنفار مفكر انو بدو ينأزني

– أكيد .. تفضل (بكل هدوء)

تأملات في الهوية على ضوء السرفيس
وتأملات وتأملات .. طبعآ الها نهاية ..

والا ما كنا مشينا!

حاجز قريب من الشام

– عطيني هويتك !

– تفضل

تأملات أخرى بالهوية مع تقليب الها وكأنها مخلوق عجيب !

– شو بتدرسي أنتي؟
– ماجسيتر
– شو؟
– ماجستيييييييييير (بعلي صوتي )

بيصفن الزلمة وبيطلع بالهوية .. طبعآ هو صافن بكلمة ماجستير
يمكن أول مرة بيسمعها!

حاجز بينطر كتير

شي تلات ارباع الساعة بنوقف عليه
بينزل حدا من الركاب وبيمشي مشي لعند الحاجز وبيقلهن معنا طلاب جامعات وعندهن دوام
لحتى نمرق ع الخط العسكري بسرعة
والعملية كلها بتاخد ربع ساعة طبعآ
ويا محلا الخط العسكري

حاجز الئم من يلي سبقو

مرة تعطل فينا السرفيس واضطرينا نطلع بشاحنة كبيرة
طلعو الشباب ورا ونحنا تلات بنات طلعنا جنب الشوفير

 

– نزلي هاالكراسي يلي ورا!
– ههههه! عم تحكي جد؟
– لا مفكرني عم أمزح يعني؟ مفكرني عم أمزح؟؟
– انا فكرتك عم تمزح معي
– ….. !! والله العظيم انا رح فرجيك .. حسابك عندي
بس كرمال هالصبايا رح مرقك هالمرة .. بس وقت شوفك مرة تانية حسابك عندي !!
– …………

ومرقنا مرقة كرمالنا نحنا الصبايا!

على أحد الحواجز

– نزلو لفتش السرفيس

نزلنا
فتش السرفيس تفتيش دقيق
وجكر الزلمة .. مفكر حالو عنجد رح يلاقي شي فيه
قلنا طلعو
وتطلع فينا نظرة جكر وحقد
وسكر الباب بقوة وعيونو عم تقدح شرر!

آخر حاجز ..

– كل مرة بدكن تنزلونا من السرفيس مشان تفتشوه
والله تفتش السرفيس ع الحاجز يلي قبلكن ويلي قبلو كمان!
– بس تخلصو هالحرية بنبطل نفتشكن!

بقول لـ يلي حدي:
حتى لو بدكن تنزلونا وتطلعونا وننطر كل هالقد
ما رح نخلص هالحرية ..

غافي كِنت

بهل البرد
وبهل الشتي
حبك دفا
ما بيختفي
بهل السهر
نطرة مطر
قلبي إلك
حلم وغفي
وينك أنت؟
غافي كِنت
وعدك إلي
ما بينطفي
ع شمعة حنان
وورق حيطان
ع روحك أنت
قلبي حِفي
وينك أنت؟
غافي كِنت
حنيني إلك
ما بيشتفي
بحبك أنا
حبك جنى
ع قلبي وجفي